Ma’ ‘ne gryn dipyn o anafiadau ymysg tîm Y Bala’r dyddie yma, gymaint felly fel bod yr hen ben a’r Dyn Tarw Potel, Ifan Hughes, ar y fainc. Mae gweld fan Dyn Tarw Potel yn y parking yn codi ofn a braw ar wrthwynebwyr sidêt yr arfordir gan eu bod yn gwybod na fedran nhw guddio na chysgodi’r bêl mewn cilfachau tywyll gan fod y dyn AI yn bownd o ddod o hyd iddi. Roedd yna ansicrwydd mawr felly ymysg pac Llandudno o’r cychwyn cyntaf. Roedden nhw;n lwcus nad oedd Clwyd yn chwarae, a’i dad Rhys yn cefnogi, oherwydd, mi fase ne ddwy fan Dyn Tarw Potel yn y parking! Go brin y base Llandudno wedi dod allan o’r bws!
Prynhawn gwlyb oedd yn wynebu’r Bala a Llandudno ddydd Sadwrn ond nid amharodd yr amodau ar safon y chwarae. Dechreuwyd y gêm gyda’r ddau dim yn cadw’r bêl yn dynn a Llandudno sgoriodd y pwyntiau agoriadol gyda chic gosb, 0-3. Ymatebodd Y Bala’n gadarn gyda’r pac yn hyrddio mlaen yn gryf, yn enwedig yn y sgrymiau. Enillodd Y Bala gic gosb ar linell dwy ar hugain Llandudno ar ôl cynfod yn hanner y gwrthwynebwyr. Tarodd Rhydian y bêl yn bert gan unioni’r sgor, 3-3.
Y Bala oedd i weld yn rheoli’r gêm erbyn diwedd yr hanner a gydag ychydig funudau yn weddill, hyrddiodd sgrym Y Bala’n gryf unwaith yn rhagor gyda Dochan yn cadw rheolaeth dda ar y bêl efo’i draed ac yn tirio’r bêl am gais cynta’r gem. Ciciodd Rhydian y trosiad, 10-3 ar yr hanner.
Dechreuodd Y Bala’r ail hanner gyda’r un patrwm, y blaenwyr yn fistar corn ar flaenwyr y gwrthwynebwyr hyd nes i’r sgrym orfod newid i fod yn un ‘uncontested’ (digystadleuaeth??). Llwyddodd Y Bala i weithio’u ffordd i hanner Llandudno cyn ail-gylchu’r bel yn gyflym ar yr ochr dywyll a’i throsglwyddo i Elgan T’isa ar yr asgell a redodd o dan y pyst i sgorio ei gais cynta’. Rhydian yn trosi eto, 17-3.
‘Doedd Llandudno ddim am roi’r ffidil yn y to a gyda chyfuniad o ddiffyg disgyblaeth gan Y Bala, gwelwyd y tîm cartref yn cael eu gwthio’n ol at eu llinell gais eu hunain cyn i Landudno ledu’r bêl yn daclus a sgorio yn y gornel. Llwyddo gyda’r traed hefyd, 17-10.
Cymerodd Y Bala afael gadarn ar y gêm yn dilyn hyn gyda dwy gic gosb lwyddiannus gan Rhydian i’w rhoi 23-10 ar y blaen ond unwaith yn rhagor daeth Llandudno’n ôl gyda chais taclus yn y gornel, 23-15. Sicrhawyd y fuddugoliaeth wrth i amddiffyn Y Bala orfodi camgymeriad gan Landudno wrth iddyn nhw geisio clirio’r bêl yn eu dwy ar hugain eu hunain. Cicwyd y bel drwodd ac Elgan T’isa oedd y cyntaf i’w chyrraedd a sgorio ei ail gais. Rhydian yn llwyddo unwaith yn rhagor gyda’r trosiad ac yn sicrhau sgôr derfynol o 30-15 i’r Bala.
Y Sadwrn nesaf mae’r rhan fwyaf o’r tîm a’r cefnogwyr yn mynd ar stag Iwan Garthnant i Kilkenny yn Iwerddon. Mae’n debyg y cân’ nhw gyfle i wylio’r Crysau Duon yn erbyn Iwerddon. Mi fydd yn dipyn o achlysur, gan fod pobol fel El Ty Nant, Clwyd Jet a Megi’n mynd. Bendigeidfran oedd yr un dwytha’ i fynd ar stag i Iwerddon ac ma’ pobol yn dal i siarad am hynny! Os bydd pawb wedi dod dros y trip, gêm oddi cartre’ yn erbyn Caernarfon fydd hi wythnos i ddydd Sadwrn.
Tudur Lynch
# | Team | Pl | Pts |
1. | Pwllheli | 22 | 103 |
2. | Nant Conwy | 22 | 101 |
3. | Caernarfon | 22 | 78 |
4. | Bala | 22 | 73 |
5. | Llandudno | 22 | 55 |
6. | Mold | 22 | 55 |
7. | Bro Ffestiniog | 22 | 45 |